TheBest
عزيزى الزائر مرحبا بيك فى منتديات الافضل سجل وحمل جميع الادعية و التلاوات القرأنية و الالعاب والبرامج وشارك معانا في الحورات والمناقشات وكل ما تريده سوف تجدو باذن الله


لتحميل الادعية و التلاوات القرانية و المشاركة في الحورات المواضيع المفيدة ومعرفة احدث الاخبار و أحدث الألعاب و البرامج الكاملة علي منتدي الأفضل وبس
 
الرئيسيةالرئيسية    س .و .جس .و .ج  بحـثبحـث  التسجيلالتسجيل  قائمة الاعضاءقائمة الاعضاء  المجموعاتالمجموعات  دخولدخول  
شاطر | 
 

 اشعار الشاعر المصرى سيد حجاب

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
eman coool
مشرفة منتدي ستار أكاديمي
مشرفة منتدي ستار أكاديمي


انثى عدد المساهمات: 1176
العمر: 20
العمل/الترفيه: طالبة
المزاج: ......................
رقـــــم الـعـضــويــه: 1526
البلد:
نقاط التميز للعضو: 2440
السٌّمعَة: 8
نقاط: 11546
تاريخ التسجيل: 06/12/2008

مُساهمةموضوع: اشعار الشاعر المصرى سيد حجاب   الأحد يوليو 05, 2009 8:04 pm


أشعار سيد حجاب s-ضربة شمس

أغنية لروحنا نعود
ألحان ياسر عبد الرحمن – غناء على الحجار


وليل تباريحنا جارحنا .. نضيع و تضيع ملامحنا
نتوه في زحمة العالم .. ما نلقاش وشنا مالم
لروحنا نعود .. و نبقى احنا
حبيبي تعالى لسه العمر في ربيعه .. و نهر الحب في قلوبنا ينابيعه
حرام نعشق و نتعاهد .. و نتفرق و نتباعد
و يبقى بكرة بين ايادينا .. و نبيعه !
--------------------------------------
أنا في التوهة ، في الزحمة .. باضيع ولا راحة ولا رحمة
تعالى انجدني من روحي .. و من توهاني في جروحي
و خلي الكون يصالحنا
----------------------------------
عينيك داري و حنان أهلي .. و فين ما باروح بتندهلي
تزهزهلي الحياة فيها .. و تتفسر خوافيها
نطير و احنا في مطارحنا !
و ليل تباريحنا جارحنا .. نضيع و تضيع ملامحنا
نتوه في زحمة العالم .. ما نلقاش وشنا مالم
لروحنا نعود .. و نبقى احنا






الحدود

واحنا فايتين ع الحدود
مستمرين في الصعوود
اختفى النيل الجميل من تحتنا
و المدن و الريف و أول عمرنا
و ابتدى شيء ينجرح جوه الوجود
و ابتدينا أسئلة ملهاش ردود
ميلنا عالشباك نخبي
دمعة فرت مننا

باصة مالشباك على البحر البعيد
واحنا داخلين بالأمل عالم جديد
كنت فاكرة يا مصر اني زهقت منك
و إكتشفت إني محال أستغنى عنك
حتى دوشة صوت جيراني
و الزحام وحشوني تاني
بسمة حلوة لطفلةلسة صغيرة
لما كنت أديها حتة سكرة
قبل مانفوتك وحشتينا
يا مصر يا أمنا
و ابتدى شيء ينجرح جوه الوجود
و ابتدينا أسئلة ملهاش ردود
ميلنا عالشباك نخبي
دمعة فرت مننا

كنت بتذكر و أنا في غاية الأسى
لعبنا الكورة في حوش المدرسة
و الشقاوة واحنا لسة صغيرين
و البراءة و الصحاب الطيبين
لما سألتني اللي جنبي
إنت مصري ؟؟...دق قلبي
إسم زي السحر رفرف عالمكان
زي نسمة مهفهفة بصوت الآذان
أيوة مصريين لآخر
كل نقطة في دمنا
و ابتدى شيء ينجرح جوه الوجود
و ابتدينا أسئلة ملهاش ردود
ميلنا عالشباك نخبي
دمعة فرت مننا

الوجوه من ثلج و عيون من قزاز
شوقي زاد للعشرة و الناس العزاز
و إبتديت أكتب و أنا فوق السحاب
إبتديت يا حبيبي في أول جواب
مصر إنتي حتة مني
مش مجرد إسم وطني
قالوا فاضل نص ساعة عالوصول
قلت ايه معنى الساعات و الا الفصول
إلا في الأرض اللي فيها
ذكرياتنا و حبنا
و ابتدى شيء ينجرح جوه الوجود
و ابتدينا أسئلة ملهاش ردود
ميلنا عالشباك نخبي
دمعة فرت مننا



يا مصري

يا مصري ليه دنياك لخابيط و الغلب محيط
والعنكبوت عشش ع الحيط وسرح ع الغيط
يا مصري قوم هش الوطاويط ... كفاياك تبليط
صعبة الحياة والحل بسيط ... حبة تخطيط
فتحت باب استيرادك
وصرفت فوق ضعف إيرادك
حِلي للخواجة استكرادك
سابك بتقرا في أورادك
وده قشّطك ونزل تشفيط
يا مصري ليه دنياك لخابيط والغلب محيط
والعنكبوت عشش ع الحيط وسرح ع الغيط
ومهولاتي تحب تزيط
ساعة الفرح زغاريد تنطيط
وفي المياتم هات يا صويت
وفي المظاهرات سخن تشيط
و في الانتخاب تنسى التصويت
يا مصري ليه دنياك لخابيط والغلب محيط
والعنكبوت عشش ع الحيط وسرح ع الغيط
وليه بترشي وتتساهل
وتضيع حقوقك بالساهل
تستاهل النار تستاهل
يا غويط ويحسبك الجاهل
سهل وساهي وغبي وعبيط
يا مصري ليه دنياك لخابيط و الغلب محيط
و العنكبوت عشش ع الحيط و سرح ع الغيط
يا مصري يا للي الغلا عاصرك
والنهب في عصرك حاصدك
قوم للحياة واسبق عصرك
ولا حاجة هترجع مصرك
إلا ان تكون شغال ونشيط
يا مصري ليه دنياك لخابيط والغلب محيط
والعنكبوت عشش ع الحيط وسرح ع الغيط
يا مصري قوم هش الوطاويط ... كفياك تبليط
صعبة الحياة والحل بسيط ... حبة تخطيط



هنا القاهرة

هنا القاهرة الساحرة الآسِرة الهادرة الساهرة الساترة السافرة

هنا القاهرة الزاهرة العاطرة الشاعرة النيّرة الخيّرة الطاهرة

هنا القاهرة الساخرة القادرة الصابرة المنذرة الثائرة الظافرة

صدى الهمس في الزحمة و الشوشرة

أسى الوحدة في اللمة و النتورة

هنا الحب و الكدب و المنظرة

نشا الغش في الوش و الإفترا

هنا القرش و الرش و القش و السمسرة

هنا الحب و الحق و الرحمة و المغفرة

و انا ف قلب دوامتك الدايرة بينا

بصرّخ بحبّك يا أجمل مدينة

يا ضحكة حزينة .. يا طايشة و رزينة

بحبّك و اعفّر جبيني في ترابك

و اعيش في رحابِك و أقف جنب بابك

جنايني أروي بالدم وردة شبابك

يا زينة جنينة حياتنا اللعينة

بحبّك يا بنت اللذين

بحبّك



فى وصف مصر

سلوا قلبى وقولوا لى جوابا * لماذا حالنا اضحى هبابا

لقد زاد الفساد وساد فينا * فلم ينفع بوليس او نيابه

وشاع الجهل حتى ان بعضا * من العلماء لم يفتح كتابا

وكنا خير خلق الله صرنا * فى ذيل القايمة وف غاية الخيابا

قفلنا الباب احبطنا الشبابا * فادمن او تطرف او تغابى

ارى احلامنا طارت سرابا * ارى جناتنا اضحت خرابا

وصرنا نعبد الدولار حتى * تقول له انت ماما وانت بابا

وملياراتنا هربت سويسرا * ونشحت م الخواجات الديابه

ونهدى مصر حبا بالاغاني * فتملؤنا اغانينا اغترابا

وسيما الهلس تشبعنا عذابا * وتشبعنا جرائدنا اكتئابا

زمان يطحن الناس الغلابة * ويحيا اللص محترما مهابا

فكن لصا اذن او عش حمارا * وكل مشا اذن او كل كبابا

ودس ع الناس اوتنداس حتى * تصير لنعل جزمتهم ترابا

امير الشعر عفوا واعتذارا * لشعرك فيه اجريت انقلابا

وما نيل المطالب بالطيابه * دى مش دنيا يا شوقى بيه دى غابه





شوك و ضل
----------

أحب ما عليا

! الشجره أم شوك و ضل

الضل وحده يتلج الحشا .. يعلّ

و الشوك يـِغلّ
...........
ما احبش القديسة

ولا اللى ما يعرف خلاف سجاده الصلا

براءه الملايكة ف ارض شايكة .. شئ يشل

و ما احبش الخسية

ولا الفلاتى الزانى حتى ويا أحجار الفلا

خساسه النجاسه والنخاسه والسياسه و قلة الحساسة

شئ يذل
.. و أحب ما عليا
الشجره أم شوك و ضل
-==================







حطة يا بطة

حطَّه يا بطَّه يا دقن القطه
بابا جاي وشايل الشنطه
إيه في الشنطه
فيها ما فيها
غش وبوليتيكا وأوَنْطَه
حطه يا بطه

حاكم بابا شغلته ظابط
ضابط هابط
شابط لابط
راقع خابط
نازل شافط
طالع لاهط
عمره ما فكَّر فكره وصابت
عمره ما نبِّتْ زرعه وطابت
يزرع سكر يطلع شطه
حطه يا بطه

بابا عشان خَدْها بالملحق
بقى ظابط واتعيِّن ملحق
واترقى سفير ف وزير
إيه السر .. السر ف بير
والسر ف طرف النبوت
واللي يحل السر يموت
ياما نفسي يا بلدنا يا شابه
يبقوا الوزرا بفلات فوت
وقلوبهم مليانه مباسطه
حطه يا بطه

يا بلدنا يا زادنا وزوادنا
يا ام جدودنا وبنت ولادنا
إيه آخرتها مع الظباط
بيروقراط على تكنوقراط
حُكَما فلاسفه فشر سقراط
واحنا يا عيني غلابه بُساط
فردانيه ما بيناش رابطه
حطه يا بطه



يتبع


____________________________

موش بتبطل لف الدنيا
و لا هتبطل لف
ده اللى يبص لحال الدنيا
يضرب كف بكف
الدنيا موش هتبطل لف

.........

دنيا بتلعب بينا الكورة
نجرى نلف شمال و يمين
و حياتنا فيها فزورة
مين فينا اللى يحلها مين
دنيا غرورة
و لا السنيورة
أم ملاية لف
ده اللى يفكر نفسه فهمها
يبقى حقيقى اتهف

الدنيا موش هتبطل لف
............

ساعة تكون حلوة و أمورة
وساعة تخلى القلب حزين
مين الأصل و مين الصورة
فيكى يا دنيا البنى آدمين
ساهية و دايرة
و طالعة و نازلة
و عمر الدمع ما جف
بس الدمعة وراها الضحكة
و وسط الضلمة نجف

و الدنيا موش هتبطل لف
الدنيا
.........
و حياتنا فيها مهدورة
بين ضحكة و آهة و أنين
و قلوبنا التايهة معذورة
عينى علينا احنا يا تايهين

موش بتبطل لف الدنيا
و لا هتبطل لف
ده اللى يبص لحال الدنيا
يضرب كف بكف
الدنيا موش هتبطل لف
الدنيا
.........








دي كلمات تتر مسلسل عبدالله النديم
كلمات رائعه
------------------

يا لولا دقة ايديكى ما انطرق بابى
طول عمرى عارى البدن و انتى جلبابى
ياللى سهرتى الليالى يونسك صوتى
متونسة ب حس مين - يا مصر - فى غيابى ؟

أدباتى .. أراجوز .. نديم صاحبى و خلانى
زجال .. مهرج .. مركب صوتى فى لسانى
و صحيت لقيتنى أعرفك و انتى عارفانى
وخدانى من مجلس الضايعين و حطانى
على أعلى منبر .. يهزك صوتى و أدانى
ياللى فطمتى النديم : رديه صغير السن
أسكت الجرح ... يسكت ... ينطق التانى




ودي اغني غنوة للحرية
و لحلم طاهر في الضماير عاش
و لوردة حمرا مفتحة مندية
و لدنيا تانية لسة ما عشنهاش
و للصبية الي الهوا شالها
و طرف شالها في الهوا رعاش
و لغنوة العاشقين عالتلة
لماالقلوب قالت و صوتنا انحاش
و لاهلنا الجدعان و الاصلا
و للصباح الي لاح و اتدلي
ودي اغني لأبني لكني
اوان غنايا ما جاش


تتر مسلسل الوسية
--------------
المقدمة :

مين اللى قال الدنيا دى وسية
فيها عبيد ملك إيد و فيها السيد
سوانا رب الناس سواسية
لا حد فينا يزيد و لا يخس إيد

.......
جينا الحياة زى النبات أبرياء
لا رضعنا كدب و لا اتفطمنا برياء
طب ليه رمانا السيف على الزيف
و كيف نواجهه غير بالصدق و الكبرياء

......
عيش يا إبن آدم بكر زى الشجر
موت و إنت واقف زيه فى مطرحك
و لا تنحنى لمخلوق بشر أو حجر
و شب فوق مهما الزمان جرّحك
......





النهاية
-----------
و تستمر الحياة
بين ابتسامة و آه
فيها اللى تاه فى دجاه
و اللى ضميره هداه

.....
و كل ضيقة و بعدها وسعة
و أهى دى الحقيقة بس منسية
و كلنا ولا تسعة و بنسعى
و دى موش وسية الناس سواسية

....
لملم جروحك يا حزين و إمشى
خطوة كمان و تخف آلامك
و إحلم بعين صاحية و لا تنامشى
غير لما تقطف زهر أحلامك






إيه يا بلاد يا غريبة .. عدُوة ولا حبيبة؟

في الليل تصحي عيونِك .. و نجومِك مش قريبة

بلاد معرفش ناسها .. و لا عارفاني بيبانها

و ماليش شبر في أساسها .. و لا طوبة في حيطانها

و خطاويَّه غريبة


عالَم رايحة و جايّة .. و أنا مين و فين مكاني؟

و إيه آخر الحكاية؟ و إيه اللي رماني؟

يا خطاويَّه الغريبة


دنيا ولا متاهة؟ دايرة و بندور وراها

في صبحها و مساها .. آهة و راها آهة

يا خطاويَّه الغريبة


تتر مسلسل الأصدقاء
-----------------

ألحان: ياسر عبد الرحمن
غناء: محمد قنديل

المقدمة:ـ


آدي إيدي مِد إيدك ... جرحي جرحك عيدي عيدك

ود دافي .. نبع صافي ... شيء كأنه نيل موافي
من وريدي و من وريدك ... يا صديقي مِد إيدك

يا صديق عمري يا صاحب ذكرياتي ... إنتَ كنز أيامي تحويشة حياتي
و مراياتي اللي باشوف جوّاها ذاتي ... و تواجهني بعيبي تكشف سيئاتي
تِقسى بحنان و استزيدك ... يا صديقي مِد إيدك

أصدقاء و الود موصول فوق زمانّا ... بيه آمنّا و له آمنّا و فيه أمانّا
بيه على الدنيا و ع الدهر استعانّا ... و إن زمنّا خانّا و في لحظة طعنّا
تستعيعدني و استعيدك ... يا صديقي مِد إيدك


النهاية:ـ


آدي يدّي مد يدك ... قد ودك قلبي ودّك
د انتَ بعد الأهل أهلي .. و اذا يوم قلبك ندهلي
حتلاقيني بقلبي عندك .. يا صديقي مد يدك

يا صديق عمري و أحلامي و عذابي ... في ليالي فرحتك عامل حسابي
في ليالي وحدتي بتدق بابي .. و عمر باب قلبي ما صدّك
يا صديقي مد يدك

أصدقاء و الود موصول فوق ظروفنا .. مهما نبعد مهما طوفنا مهما شفنا
في ساعات شدتنا و قلقنا و خوفنا ... تستعيدني و استردّك
يا صديقي مد يدك



ألحان: عمار الشريعي
غناء: فرقة الأصدقاء

المقدمة:


ملعون في كل كتاب يا عار الخيانة
اللعنة و النار ع اللي خانوا الأمانة
عاشوا على موتنا .. و موتهم حيانا
عليهم اللعنة في ترابنا و سمانا

إتردي يا ابواب البيوت .. و ابعديهم
و إتسدي يا ابواب القلوب .. و اطرديهم
و اتفتحي يا ابواب الجحيم .. و اورديهم
جزاة ما خانونا و باعونا لعدانا

ما تطلعيش يا شمس ع اللي يخونّا
و ما تنطفيش يا نار قلوبنا و عيونّا
و ما ترحميش اللي احنا على قلبه هنّا
و اكوي بنارنا كل نقطة في دمانا


النهاية:ـ


حبيبتي من ضفايرها طل القمر
و بين شفايفها ندى الورد بان
ضحكتها بتهز الشجر و الحجر
و حنانها بيصحّي الحياة في النبات

حبيبتي بتعلّمني أحب الحياة
من حبي فيها حياتي شمس و ربيع
و الحب في الدنيا دي طوق النجاة
لولاه يضيع قلب المحب الوديع

يا حلوة يا بلدنا يا نيل سلسبيل
بحبك انتِ رفعنا راسنا لفوق
لو الزمن ليّل ما يرهبنا ليل
شوقنا في عروقنا يصحّي شمس الشروق

الحلوة قلب كبير يضم الولاد
و زاد و زوادة و ضِلة و سبيل
الموت و الاستشهاد عشانها ميلاد
و كلنا عشّاق ترابها النبيل





لو كنت أمير
-
من أمراء الحواديت
كنت ادى لكل فقير وفقيرة بيت
بيت بجنينة مليانة زهور
وبعشة مليانة كتاكيت
وأعلّق فوقه قمر بنور
ونجوم لولى... فتافيت فتافيت
لوكنت أمير
من أمراء الحواديت
كنت ادى لـ... وزرائى محاريت
علشان يشتغلوا بايديهم ويشوفوا ازاى
الأرض السمرا لما نحرتها كدة رايح جاى
بتطلع غلّة وبن وقطن وضل وشاى
وتطلع غاب نعمل منه الأرغول والناى
لو كنت أمير
من أمراء الحواديت
كنت أدّى لكل الأطفال الحلوين ألعاب
قطر بقضبان..فرشة ألوان.. مية أو زيت
وابنيلهم قصر على المالح من غير أبواب
قصر بقبة لولى وقبة مرجان
وأعلّق عالقبة أجراس
فضة ومرمر ودهب ونحاس
لكن قبل ده كلّه لو كنت أمير
من أمراء الحواديت
كنت ادّى لكل الناس
وردة وكتاب
وردة وكتاب
وكمان قبل ده كلّه
قبل ده كلّه
لو كنت أمير
من أمراء الحواديت
كنت أرفرف زى النسمة وادخل فى الحلق
وأقطّع نص السنة الخلق
نص اللى مابيقولش الحق
علشان يتعلمه
امتى يقولوا أيوة
وامتى لأ
ده لوكنت أمير
من أمراء الحواديت



مسلسل الشهد والدموع – مقدمة
ألحان عمار الشريعى – غناء على الحجار

تحت نفس الشمس وفوق نفس التراب
كلنا بنجرى ورا نفس السراب
كلنا من أم واحدة.. أب واحد.. دم واحد
بس حاسِّين باغتراب
من حنان الحب هل الغل جانا
من مرارة الغل جلجل صوت رجانا
نبكى من الغل اللي بيعكر حياتنا
ولا من الحب اللى هدهدنا وشجانا
يا زمان الغربة ليلك بيحاصرنا
وفى ضلامه المر طاوينا وعاصرنا
بس طول ما الحب بيرفرف علينا
الجدور حنمدها ونصنع مصيرنا

مسلسل الشهد والدموع – نهاية

نفس الشموس بتبوس على روسنا
نفس التراب يحضن خطاوينا
طب ليه بنجرى ونهرى فى نفوسنا
وليه نعيش ناكل فى بعضينا
آدى الحقوق وآدى اللى طالبينها
والحق تاه فى الباطل البطا
لوقلوبنا تاهت عن محبينها
ونجومنا عالية بعيدة ما تنطال


أغنية حتة حلم
غناء شادية

أما أنا يا ابني شفت لك امبارح حتة حلم
أغرب من أغرب فيلم
شُفت لك الديك بطاقية حمرا و جلابية
واقف بيكلّم شمس الصبحية
يا شموسة يا ام ضفاير دهبية
دهبِك فالصو.. قُصّيه و ارميه

الشمس انكسفت خالص
بقى لونها أصفر خالص
زي لمونة من الدهب الخالص
و انعصرت خالص
و قالت له بصوتها الدهبي
تقصد إيه؟

قال لها
لو سبتي السما و نرلتي السوق
الناس حيبصوا لك من تحت لفوق
و يقولوا
و دي تنفعنا بإيه؟

لو كنتي جنيه
كنت اشتري بيكي مصاصة و بالون اتنطط بيه
لو كنتي جنيه أو حتى قرش نحاس
مش كنتي بقيتي مفيدة لكل الناس؟

فكرّت الشمس الدهبية شوية
و قالت للديك
إنت ولا فاهم حاجة يا ديك
و عامل لي فكيك
ده لولايا عليك
ما كنت طلعت من البيضة
و لا كنت اتعلّمت الغنا و المزازيك

و لولايا على الناس و الدنيا
ما كانتش الأيام البيضا تصبح بيضا
ولا كانت أرض الناس تولد فاكهة
و سنابل و فاصوليا
و لا ورد ندوّبه في كلونيا

الديك المتكلّم .. بلّم
و جري يا فكيك من غير ما يحيّي و لا يسلّم
و صحيت و انا باصرخ و اتكلّم
خدوا كل فلوسي .. ورق و دهب و نحاس
و سيبوا لي الشمس يا ناس
سيبوا لي الشمس يا ناس
سيبوا لي الشمس يا ناس

من ورا ستارة الليالي
شمس بكرة جايّة تاني
إحنا شايفينِك تعالي
يا ام ضحكة برتقاني

العروسة الدهبية
جايّة و ف شفايفها وردة
شمس بكرة جايّة جايّة
بكرة أجمل م النهارده

شُفت يوم عصفورة نونو
لسه طالعة من أودتها
ريشها كان مبلول و لونه
لون غناها و صوصوتها

قمت قُلت ف عقل بالي
بقى دي جناحها يشيلها؟
سِبتها و مشيت في حالي
بعد مدة قلت آجي لها

قال لي واحد من جيرانها
ياه دي طارت ليها مدة
قلت معنى طيرانها
بكرة أجمل م النهارده

شُفت مرة مهرة سمرا
نونو ماسكة ف ديل مامتها
قُلت بكرة حتبقى حرة
تجري وحديها براحتها

عدى شهر و شهر تاني
شُفتها فرسة جميلة
تنطلق تجري ف ثواني
تقطع الرحلة الطويلة

قمت قلت لها قولي لي
ليه بتجري يا مهرة شاردة
قالت الريح بتنادي لي
بكرة أجمل م النهارده

من ورا ستارة الليالي
شمس بكرة جايّة تاني
إحنا شايفينِك تعالي
يا ام ضحكة برتقاني

العروسة الدهبية
جايّة و ف شفايفها وردة
شمس بكرة جايّة جايّة
بكرة أجمل م النهارده



مسلسل ليالى الحلمية – مقدمة
ألحان ميشيل المصرى – غناء محمد الحلو

منين بيجي الشجن.. من اختلاف الزمن
ومنين بيجي الهوى.. من اختلاف الهوى
ومنين بيجي السواد.. من الطمع والعناد
ومنين بيجي الرضا ..من الايمان بالقضا

من انكسار الروح في دوح الوطن
يجي احتضار الشوق في سجن البدن
من اختمار الحلم يجي النهار
يعود غريب الدار لأهل وسكن

ليه يا زمان ما سبتناش أبرياء
وواخدنا ليه في طريق ما منوش رجوع
أقسى همومنا يفجر السخرية
وأصفى ضحكة تتوه في بحر الدموع

منين بيجي الشجن من.. اختلاف الزمن
ومنين بيجي الهوى من.. اختلاف الهوى
ومنين بيجي السواد من.. الطمع والعناد
ومنين بيجي الرضا من.. الايمان بالقضا

ولفين ياخدنا الأنين
لليالي مالهاش عينين
ولفين ياخدنا الحنين
لواحةالحيرانين

مسلسل ليالى الحلمية – نهاية

ما تسرسبيش يا سنيننا من بين ايدينا
ولا تنتهيش ده احنا يا دوب ابتدينا
واللى له أول بكرة حيبان له آخر
وبكرة تفرج مهما ضاقت علينا

ولفين ياخدنا الأنين
لليالي مالهاش عينين
ولفين ياخدناالحنين
لواحة الحيرانين

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
الملاك البرئ
عضو متطور
عضو متطور


انثى عدد المساهمات: 349
العمر: 25
العمل/الترفيه: طالبه باقتصاد وعلوم سياسية
المزاج: تمام
sms: My SMS The best
رقـــــم الـعـضــويــه: 2519
السٌّمعَة: 2
نقاط: 10655
تاريخ التسجيل: 09/04/2009

مُساهمةموضوع: رد: اشعار الشاعر المصرى سيد حجاب   الأحد يوليو 05, 2009 8:17 pm

جميله قوى والله تسلم ايدك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
جابر المصرى
مشرف منتدي اللغة العربية والشعر
مشرف منتدي اللغة العربية والشعر


ذكر عدد المساهمات: 2888
العمر: 25
العمل/الترفيه: بضور على عروسه هههههه
المزاج: هاتوحشوني كلكم بجد والله مش هلكى احلا منكم بجد
sms: انا شاء الله هتسمع اخباره حلوه كتير عليا انا شاء الله قريبا بازن الله و فعلن لقيت الانسانه الى كونت بضور عليها و حبيتها كتير والله من قلبى و بجد والله ربنا يكرمنه و اخليها اسعد وحدا فى الدنيا بازن الله
رقـــــم الـعـضــويــه: 2099
البلد:
نقاط التميز للعضو: 4480
السٌّمعَة: 16
نقاط: 13530
تاريخ التسجيل: 25/02/2009

مُساهمةموضوع: رد: اشعار الشاعر المصرى سيد حجاب   الإثنين يوليو 06, 2009 11:09 pm

تسلم ايدكى يا امونه جمبل اوى و عوزين موضيع جميل من دى كتير

و انا كبرت الخط شوبه يا جميل علشان الاعضاء و المشرفين يعرفه يكراوها

_________________
حبيبى عاشقة الشعر
مشاعر واحاسيس جميلة تنبض بالحب والآلم





[/url]حوش و بارك على طول و انا معاكم لغايت يوم الخمس


http://thebest.nicetopics.com/montada-f14/topic-t21188-15.htm#241363
[url]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
eman coool
مشرفة منتدي ستار أكاديمي
مشرفة منتدي ستار أكاديمي


انثى عدد المساهمات: 1176
العمر: 20
العمل/الترفيه: طالبة
المزاج: ......................
رقـــــم الـعـضــويــه: 1526
البلد:
نقاط التميز للعضو: 2440
السٌّمعَة: 8
نقاط: 11546
تاريخ التسجيل: 06/12/2008

مُساهمةموضوع: رد: اشعار الشاعر المصرى سيد حجاب   الخميس يوليو 09, 2009 4:44 pm

شكرا للمرور ياملاك وشكرا للمرور والتعديل ياجابر وان شاء الله اعمل الى اقدر عليه نورتو الموضوع
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شيرى
عضو مبتدئ
عضو مبتدئ


انثى عدد المساهمات: 130
العمر: 21
العمل/الترفيه: طالبة
المزاج: زى العسل
sms: عاشقة رسول الله
السٌّمعَة: 4
نقاط: 10399
تاريخ التسجيل: 06/05/2009

مُساهمةموضوع: رد: اشعار الشاعر المصرى سيد حجاب   الخميس يوليو 09, 2009 5:18 pm

طبعا تقدرى يا بيبى بجد الكلام جميل اوى وانا بشكرك على المجهود يا ايمى
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
eman coool
مشرفة منتدي ستار أكاديمي
مشرفة منتدي ستار أكاديمي


انثى عدد المساهمات: 1176
العمر: 20
العمل/الترفيه: طالبة
المزاج: ......................
رقـــــم الـعـضــويــه: 1526
البلد:
نقاط التميز للعضو: 2440
السٌّمعَة: 8
نقاط: 11546
تاريخ التسجيل: 06/12/2008

مُساهمةموضوع: رد: اشعار الشاعر المصرى سيد حجاب   الخميس يوليو 09, 2009 6:17 pm

باذن الله ياشيرى شكرا ياقمر على المرور
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
جابر المصرى
مشرف منتدي اللغة العربية والشعر
مشرف منتدي اللغة العربية والشعر


ذكر عدد المساهمات: 2888
العمر: 25
العمل/الترفيه: بضور على عروسه هههههه
المزاج: هاتوحشوني كلكم بجد والله مش هلكى احلا منكم بجد
sms: انا شاء الله هتسمع اخباره حلوه كتير عليا انا شاء الله قريبا بازن الله و فعلن لقيت الانسانه الى كونت بضور عليها و حبيتها كتير والله من قلبى و بجد والله ربنا يكرمنه و اخليها اسعد وحدا فى الدنيا بازن الله
رقـــــم الـعـضــويــه: 2099
البلد:
نقاط التميز للعضو: 4480
السٌّمعَة: 16
نقاط: 13530
تاريخ التسجيل: 25/02/2009

مُساهمةموضوع: رد: اشعار الشاعر المصرى سيد حجاب   السبت يوليو 11, 2009 12:29 am

انا بشكركم انتيو الاتتنين على الموضوع الجميل و على المشركات الى زى العسب ده

_________________
حبيبى عاشقة الشعر
مشاعر واحاسيس جميلة تنبض بالحب والآلم





[/url]حوش و بارك على طول و انا معاكم لغايت يوم الخمس


http://thebest.nicetopics.com/montada-f14/topic-t21188-15.htm#241363
[url]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 

اشعار الشاعر المصرى سيد حجاب

استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

 مواضيع مماثلة

-
» أجمل ما كتب الشاعر فاروق جويدة عن الحب
» منشور هام جداااااااا عن فائض الميزانية وتوزيعها على موظفين هيئه البريد المصرى

صلاحيات هذا المنتدى:لاتستطيع الرد على المواضيع في هذا المنتدى
TheBest ::  :: -